Á procura da terceira persoa implicada no butrón da Cañiza

A Garda Civil e a Policía continúan "tirando do fio" para a captura dunha terceira persoa que "desconfían" pode estar implicada no atraco frustrado á sucursal de Caixa Galicia que tivo lugar no municipio pontevedrés da Cañiza pouco despois das seis e media da madrugada do martes. Sospéitase quen é esa terceira persoa, pero cómpre tempo e discreción", apuntan os que coñecen a investigación do suceso, tras o que foron capturados dous vellos coñecidos das Forzas de Seguridade do Estado cun amplo historial delituoso ás súas costas: os vigueses José Vilar Casal e José Ángel Martíns Mendoza. "Caeron dous e espérase que poida caer algún máis dese grupo organizado", apostilaron.

Cerco ós incendiarios

Ingresa no cárcere de Teixeiro o presunto autor do lume de Teo, e hoxe declarará en Ribeira o arrestado pola implicación no de Boiro, que calcinou
As forzas da orde e as autoridades xudiciais afirman que serán implacables cos que lle prendan lume ó monte, e onte, nunha xornada na que as lapas deron unha tregua coa axuda da chuvia, decretouse o ingreso en prisión do sospeitoso de provocar un incendio forestal no municipio coruñés de Teo. O home, de 63 anos, ingresou en prisión preventiva no cárcere de Teixeiro despois de declarar nos xulgados de Fontiñas á espera de que se celebre o xuízo, xa que os responsables xudiciais consideran que hai indicios suficientes de que pode ser o autor do lume.
O detido responde ás iniciais A.N.S., é orixinario de Val do Dubra e está acusado dun incendio forestal en Santa María de Lucín, no municipio coruñés de Teo, que queimou unhas 26 hectáreas de monte e afectou as proximidades de vivendas, ata o punto de que as autoridades expuxeron a posibilidade de desaloxar algúns residentes.